32% íbúða á öllu landinu seldust yfir ásettu verði í maí sem er methlutfall frá upphafi mælinga í janúar árið 2013. Hlutfallið var hæst fyrir sérbýli á höfuðborgarsvæðinu eða um 42,7%. Hlutfallið fyrir fjölbýli á höfuðborgarsvæðinu var aðeins lægra eða 37,2%. Þetta kemur fram í mánaðarskýrslu HMS fyrir júlí.
“Á höfuðborgarsvæðinu var hátt hlutfall íbúða sem seldust yfir ásettu verði í öllum verðflokkum en þó var hlutfallið lægst á meðal íbúða sem seldust á undir 35 m.kr. og hæst á meðal íbúða á 45-75 m.kr.” segir einnig í skýrslunni
Sölutími íbúða aldrei verið styttri
Sölutími íbúða í maímánuði hefur aldrei verið styttri. Á höfuðborgarsvæðinu er sölutími nú að jafnaði 38 dagar miðað við meðaltal síðustu þriggja mánaða. Á landsbyggðinni er meðalsölutíminn lengri, eða 78 dagar.
Samkvæmt gögnum sem HMS hefur voru gefnir út 1.156 kaupsamningar um íbúðarhúsnæði í maí.
Það virðist aðeins hafa hægt á fasteignamarkaði en þetta er í fyrsta sinn síðan í ágúst á síðasta ári sem ekki er slegið met í fjölda kaupsamninga miðað við árstíma.
Sjá einnig: Aldrei fleiri kaupsamningar á fasteignamarkaði
“Hluti af ástæðunni fyrir færri kaupsamningum gæti verið að framboð íbúða hefur minnkað verulega undanfarið og að fólk eigi því einfaldlega erfiðara um vik að finna íbúðir við hæfi. Nú eru tæplega 1.800 íbúðir auglýstar til sölu á landinu öllu og hafa ekki verið færri frá upphafi mælinga um haustið 2017. Þegar mest lét í maí í fyrra voru rétt tæplega 4.000 íbúðir til sölu,” segir í skýrslunni.
Eins og er talað um hér þá skiptir framboð og eftirspurn gríðarlega miklu máli í verði á fasteignum. Lítið framboð getur haft áhrif á verulegar verðhækkunum á undanförnum þremur mánuðum. Íbúðaverð á höfuðborgarsvæðinu hefur hækkað um 12,9% á undanförnum 12 mánuðum og þar af 5,2% aðeins á síðustu þremur mánuðum.
