Tekjur hafa verið að aukast töluvert af útleigu íbúða á Airbnb á síðustu mánuðum eftir mikla lægð síðan heimsfaraldurinn fór af stað. Þetta kemur fram í mánaðarskýrslu Húsnæðis- og mannvirkjastofnun. Nýtingarhlutfall þeirra íbúða sem í boði eru hefur hækkað mjög mikið það sem liðið er af ári, en það hefur farið úr 10% í janúar í um 73% í júlí.
Mynd er tekin úr mánaðarskýrslu hagdeildar HMS fyrir september 2021.
Fjöldi auglýstra eigna minni
Eins og hefur verið rætt hér áður hefur fækkað verulega af íbúðum til sölu. Tæplega 1.500 íbúðir voru til sölu í byrjun september á öllu landinu en í maí í fyrra náði fjöldinn hámarki í um 4.000 talsins. Á höfuðborgarsvæðinu eru nú tæplega 500 íbúðir til sölu en voru flestar rúmlega 1.800 í maí í fyrra sem er 72% samdráttur.
Sjá einnig: Methlutfall íbúða seldist yfir ásettu verði
Sölutími lengist og færri íbúðir seljast á yfirverði
“Sölutími fasteigna miðað við þriggja mánaða meðaltal hefur lengst lítillega á höfuðborgarsvæðinu og í nágrenni þess í nýjustu mælingu en er þó nálægt sögulegu lágmarki sem mældist í síðasta mánuði. Ef ekki er tekið þriggja mánaða meðaltal má sjá meiri lengingu sölutíma. Annars staðar á landsbyggðinni hefur sölutíminn ekki mælst áður jafn stuttur og nú,” segir í skýrslunni.
Hlutfall íbúða sem seljast á yfirverði lækkar í fyrsta skipti síðan í janúar á þessu ári. Lækkunin var 1,3% á milli mánaða. Hlutfall íbúða sem seldust á yfirverði var 37,7% á höfuðborgarsvæði, 19,5% á landsbyggð og 15,6% í nágrenni höguðborgarsvæðis.
