Nýja fjártæknifélagið Hluteign mun á næstu misserum bjóða upp á fasteignakaup í smásölu. Það þýðir að fólk getur fjárfest í fasteignum fyrir þá upphæð sem hentar þeim, alveg niður í 10.000kr. Þannig mun Hluteign gera fólki kleift að njóta góðs af fasteignahækkunum og leigutekjum án þess að þurfa að borga margar milljónir inn á fasteign.
“Við sjáum tækifæri í því að hjálpa fólki að ná öruggri og góðri ávöxtun, en það er auðvitað ekki hægt að lofa neinu, við horfum bara á söguna og fasteignamarkaðurinn heldur áfram að sanna sig að vera mjög öruggur fjárfestingakostur,” segir Einar Þór Gústafsson, stjórnarmaður hjá Hluteign í viðtali við Fasteignabloggið.
Sjá einnig: 35.000 nýjar íbúðir á markað
Hvernig virkar Hluteign?
Hver og einn aðili mun halda á eignarhlut í samræmi við það fjármagn sem viðkomandi leggur út, ekki ósvipað því og þegar pör kaupa eign og eru skráð með 50% hluta hvor.
“Fólk fær að velja hvaða fasteign það fjárfestir í, eins og fólk getur átt fyrir ákveðna upphæð í Marel eða Icelandair þá getur það átt fyrir ákveðna upphæð í Dúfnahólum 10 sem dæmi,” segir Einar.
Engin lán
“Engin lán verða á eignunum en kaup á hverri fasteign verður fjármögnuð af fólki sem ákveður að fjárfesta í fasteignum á vegum Hluteignar,” segir Einar.
Hluteign bindur vonir við það að fyrstu eignir fari í sölu í byrjun næsta árs og að útleiga hefjist í beinu framhaldi. Skráning er þegar hafin á biðlista sem veitir skráðum aðilum forkaupsrétt í 48 klukkustundir eftir opnun.
Hægt er að lesa betur um Hluteign og skrá sig á biðlista á heimasíðu þeirra: https://www.hluteign.is/
