Fjártæknifélagið Hluteign hefur hlotið aðild að Fjártækniklasanum, samfélagi sem hverfist um eflingu nýsköpunar í fjármálum á Íslandi. Meðal annarra aðila í Fjártækniklasanum eru Arion, Kvika, Landsbankinn, Íslandsbanki og Seðlabankinn auk ört vaxandi nýsköpunarfyrirtæki á borð við Grid, Meniga, Lucinity, Monerium, PayAnalytics, indó, Igloo ofl. sem flest eiga sammerkt að hafa hlotið milljarða króna fjármagnanir á undanförnum árum.
Hluteign, nýtt fjártækni- og nýsköpunarfélag sem kynnt var fyrir almenningi í haust, stefnir á að marka þáttaskil á íslenskum fasteignamarkaði með smásölu á fasteignum í byrjun næsta árs – þegar öll tilskilin leyfi eru komin í hús. Megin markmið félagsins er að bjóða landsmönnum upp á að fjárfesta í fasteignum óháð eiginfjárstöðu og lánstrausti og auka þannig aðgengi almennings að fasteignamarkaði og arbærri fjárfestingu. Þá þegar hafa rúmlega þúsund Íslendingar skráð sig á biðlista Hluteignar sem opinn er til 1.desember n.k.
Fjártækniklasinn hefur verið starfræktur frá árinu 2018 og þar gefst fyrirtækjum kostur á að taka þátt í samfélagi fjártæknifélaga og ýta undir samstarf og miðlun þekkingar á milli fyrirtækja sem starfa innan geirans. Auk þess sem klasinn vinnur almennt að framgangi fjártækni, svo sem með því að koma á tengingum við erlend fyrirtæki og klasa.
„Það er gaman að fá Hluteign sem aðila að Fjártækniklasanum. Hluteign er að gera spennandi hluti, sem snúast um að færa almenningi fleiri tól til að fjárfesta, spara og efnast. Þetta er hluti af mikilli bylgju í fjártækni um þessar mundir, sem gengur út á að valdefla almenning og skapa honum fleiri tækifæri. Hluteign hefur nú þegar hlotið athygli annarra í vistkerfi fjártækninnar á Íslandi, sem mögulega geta tekið þátt í að gera sýnina að veruleika. Við hlökkum til að vera Hluteign innan handar í að gera þetta vel og á ábyrgan hátt,” segir Gunnlaugur Jónsson, framkvæmdastjóri Fjártækniklasans.
„Við erum reglulega þakklát fyrir að fá tækifæri til að vinna með með þeim framúrskarandi fyrirtækjum sem starfa innan klasans. Reynslan er allt umlykjandi og við hlökkum mikið til að fá að læra af og leita til þessa fremsta fólks í nýsköpun á Íslandi í dag. Við höfum þó verið þeirrar lukku aðnjótandi frá fyrsta degi að hafa fengið aðstoð og ráðgjöf frá starfsfólki klasans og finnum vel fyrir að þarna er öflugt bakland sem setur nýsköpun og framþróun í fjártækni á Íslandi í forgrunn,” segir Einar Ben, stjórnarformaður Hluteignar.
