Merki eru um minnkandi eftirspurn og kólnun á fasteignamarkaði. Það þýðir þó ekki að hann sé frosinn eins og á árunum eftir hrun, en fasteignamarkaðurinn líkist þó frekar því sem var 2019 og 2020. Þetta kemur fram í mánaðarskýrslu HMS fyrir nóvember 2022.
Eftirspurn minnkar
“Hver fasteignaauglýsing fær að jafnaði umtalsvert færri smelli nú en áður sem gefur til kynna að færri séu að leita sér að íbúð. Í byrjun febrúar, þegar framboð íbúða var í lágmarki, fékk hver auglýsing á höfuðborgarsvæðinu að meðaltali 149 smelli á dag en í fyrri hluta nóvember var sú tala komin niður í 42. Svipaða sögu er að segja í nágrannasveitarfélögum höfuðborgarsvæðisins þar sem hver auglýsing fær að jafnaði 25 smelli á dag en þegar mest lét í apríl síðastliðnum voru smellirnir um 75 á hverja auglýsingu. Minna hefur
dregið úr smellum annars staðar á landsbyggðinni,” segir í skýrslunni.
Framboð íbúða eykst hratt
Fjöldi íbúða til sölu á höfuðborgarsvæðinu í byrjun nóvember voru 1.317 en þann 14. nóvember voru þær komnar í 1.470. Íbúðum til sölu hefur því fjölgað um 12% á aðeins 14 dögum, fjöldi íbúða til sölu hefur því aukist hratt.
Auk þess sem að framboð íbúða eykst hratt þá hefur fækkað íbúðum sem seljast yfir ásettu verði, dregið úr sölu og hækkun fasteignaverðs hefur hægt verulega á sér. Allt þetta bendir til að toppnum á fasteignamarkaði hafi verið náð.
Leigumarkaður
“Hækkanir leiguverðs eru enn nokkuð hóflegar miðað við vísitölu leiguverðs fyrir októbermánuð. Á síðustu 12 mánuðum hefur leiga hækkað um 8,4% sem er minna en hækkun almenns verðlags. Fyrir vikið hefur leiga á föstu verðlagi lækkað. Þrátt fyrir einhverjar hækkanir allt frá því í júní er leiguverð, á föstu verðlagi, nú 2,5% lægra en í byrjun árs og 8,2% lægra en þegar það náði hámarki í byrjun árs 2020,” segir í skýrslunni.
