Heildarmat fasteigna á Íslandi hækkar um 7,4% fyrra ári og verður 10.340 milljarðar króna, samkvæmt nýju fasteignamati Þjóðskrár fyrir árið 2022. Mest er hækkun fasteignamats á Vestfjörðum eða um 16,3%. Þetta er umtalsvert meiri hækkun en tilkynnt var um fyrir ári síðan þegar fasteignamat hækkaði um 2,1% á landinu öllu.
Hér getur þú flett upp fasteignamatinu á þinni fasteign fyrir árið 2022.
Heildarfasteignamat á höfuðborgarsvæðinu hækkar um 8% en um 5,9% á landsbyggðinni. Mesta hækkunin er á Vestfjörðum eða um 16,3%, hækkunin er 8,6% á Norðurlandi vestra, 6,7% á Suðurlandi, 6,6% á Austurlandi, 5,1% á Suðurnesjum, 4,8% á Vesturlandi og 4,2% á Norðurlandi eystra.
Af einstaka bæjarfélögum hækkar heildarfasteignamat mest Í Bolungarvík eða um 22,8%, um 18,9% í Ísafjarðarbæ og um 15,3% í Vesturbyggð. Mesta lækkunin er í Skorradalshreppi þar sem fasteignamatið lækkar um 2,6%.
„Við erum að sjá nokkuð meiri hækkun á fasteignamati heilt yfir landið en fyrir ári síðan sem er í takt við þróun fasteignaverðs á tímabilinu febrúar 2020 til febrúar 2021. Fyrir ári síðan ríkti nokkur spenna um hvaða áhrif Covid-19 myndi hafa á matið en við sjáum að aðrir þættir eins og lægri vextir hafa haft talsverð áhrif á fasteignamarkaðinn og þar með fasteignamatið,“ segir Margrét Hauksdóttir forstjóri Þjóðskrár um fasteignamatið sem Þjóðskrá gefur út. Almennt eru litlar breytingar á aðferðarfræði fasteignamats á milli ára að þessu sinni.
Sjá einnig: Hver er munurinn á fasteignamati og söluverðmati?
Fasteignamat sumarhúsa hækkar um rúm 4%
Fasteignamat sumarhúsa fyrir árið 2022 hækkar að meðaltali um 4,1% þegar litið er á landið í heild. Mesta hækkunin er á höfuðborgarsvæðinu þar sem sumarhús hækka um 9,4% en minnst á Vesturlandi þar sem hækkunin er 1,2%.
Fasteignamat atvinnuhúsnæðis hækkar um 6,2% á landinu öllu; um 5,4% á höfuðborgarsvæðinu en um 8,0% á landsbyggðinni.
Nánari upplýsingar um fasteignamat 2022
Eigendur fasteigna geta frá 15. júní nálgast tilkynningarseðil um mat á eignum sínum í pósthólf sitt á www.island.is.
Langflestar fasteignir eru endurmetnar árlega út frá nýjustu matsforsendum og byggir meðal annars á upplýsingum úr þinglýstum kaupsamningum auk fjölmargra annarra þátta sem hafa áhrif á verðmæti fasteigna. Nýja fasteignamatið miðast við verðlag fasteigna í febrúar 2021. Það tekur gildi 31. desember 2021 og gildir fyrir árið 2022. Frestur til að gera athugasemdir við nýtt fasteignamat er til 30. desember 2021.
