Í júní framkvæmdi HMS könnun meðal fasteignasala um stöðu markaðarins. Af þeim 330 sem fengu könnunina svöruðu 112, eða um 34%. Niðurstöðurnar sýna að fasteignasalar telja markaðinn nú vera á valdi kaupenda, sérstaklega á höfuðborgarsvæðinu. Á landsbyggðinni eru þó fleiri sem sjá markaðinn sem í jafnvægi. Þetta er breyting frá fyrri mánuði þegar flestir töldu markaðinn hvorki halla að kaupendum né seljendum. Þetta kemur fram í skýrslu HMS fyrir maí mánuð 2025.
Markaður við stofuhita í janúar til apríl
Mælingar HMS sýna að fasteignamarkaðurinn var í meðallagi fyrstu fjóra mánuði ársins, bæði hvað varðar fjölda kaupsamninga og verðþrýsting. Fjöldi samninga var í samræmi við meðaltal síðustu tíu ára á öllum mánuðum tímabilsins.
Markaðsleiga hefur hækkað um tæp 9% á síðustu 12 mánuðum
Leiguverð á höfuðborgarsvæðinu hækkaði um 1,15% í maí og stendur vísitala leiguverðs nú í 123,3 stigum. Á síðustu 12 mánuðum hefur leiguverð hækkað um 8,83%, sem er umfram bæði verðbólgu (3,8%) og hækkun íbúðaverðs (5,72%). Að raunvirði nemur hækkunin 4,9% á ársgrundvelli í maí, samanborið við 6,6% í apríl.
Óverðtryggðir vextir banka lækka eftir stýrivaxtalækkun
Eftir að Seðlabankinn lækkaði stýrivexti úr 7,75% í 7,5% í maí, lækkuðu bankarnir breytilega óverðtryggða vexti í kjölfarið. Lægstu vextir standa nú í 9% hjá Landsbankanum, 9,19% hjá Arion og 9,25% hjá Íslandsbanka.
Fjármálaþjónustan Auður, sem starfar undir Kviku, býður nú lán með 8,5% vöxtum – en aðeins með allt að 55% veðsetningu. Til samanburðar miðast veðsetningarþök fyrir lægstu kjör hjá bönkunum við 60–70%.
Lægstu vextir hjá lífeyrissjóðum eru 8,72%, en margir sjóðir bjóða ekki slíkt lán og setja aukin skilyrði fyrir veitingu íbúðalána.
