Hlutfall fyrstu kaupenda af kaupendum íbúða hefur minnkað ört á síðustu mánuðum, sem er skiljanlegt þar sem vextir hafa hækkað og lánþegaskilyrði hert. Þetta kemur fram í hagsjá á vef Landsbankans.
“Hækkandi húsnæðisverð, hærri vextir og þrengri lánþegaskilyrði hafa gert fólki erfiðara um vik að komast inn á fasteignamarkaðinn. Íbúðaverð hefur hækkað um 50% á þremur árum, stýrivextir hafa verið hækkaðir úr 0,75% í 6% á einu og hálfu ári og Seðlabankinn hefur hert þær kröfur sem gerðar eru til nýrra lánþega, bæði hvað varðar veðsetningu og greiðslubyrði,” segir í hagsjánni.
Sjá einnig: Eftirspurn á fasteignamarkaði minnkar
Verðtryggt lán í stað óverðtryggðs
Lántakar hafa verið að færa sig yfir í verðtryggð lán í stað óverðtryggðs til þess að lækka greiðslubyrði. Það má gera ráð fyrir að nokkur fjöldi kaupenda kæmist nú ekki inn á eignamarkaðinn öðruvísi en með því að taka verðtryggt lán.
Fjórðungur íbúða í eigu fólks sem á fleiri en eina íbúð
“Fjórðungur af öllum íbúðum á landinu sem eru í eigu einstaklinga, eru í eigu fólks sem á fleiri en eina íbúð. Þetta má lesa út úr gögnum Húsnæðis- og mannvirkjastofnunar um fasteignamarkaðinn. Hlutfallið hefur hækkað smám saman frá aldamótum þegar það var 18%, en haldist nokkuð stöðugt í kringum 25% síðustu tíu ár,” segir í hagsjánni.
