“Fasteignamarkaðurinn heldur áfram að kólna og hefur viðsnúningurinn verið nokkuð hraður. Framboð íbúða eykst hratt, viðskiptum fer fækkandi og sömuleiðis hefur hlutfall íbúða sem selst yfir ásettu verði minnkað. Nokkuð ljóst er að það eigi eftir að draga verulega úr verðhækkunum sem hafa einkennt fasteignamarkaðinn á undanförnum árum en óvíst er hvort að fasteignaverð eigi eftir að lækka. Það veltur meðal annars á því að hve miklu leyti heimilin færa sig yfir í verðtryggð lán.” Þetta kemur fram í mánaðarskýrslu HMS fyrir október 2022.
Enn dregur úr íbúðaverðshækkunum
Það er aldeilis að dragast úr hækkunum á íbúðaverði en þriggja mánaða hækkun vísitölu íbúðaverðs stendur nú í 1,5%, sem er töluvert minna en í maí en þá mældist hún 9,1%. Þá lækkaði íbúðaverð um 0,4% á milli mánaða í ágúst á höfuðborgarsvæðinu en hækkaði um 0,8% í september.
Meðalsölutími íbúða lengist, en hann er nú 41 dagur á miðað við 39,7 daga í júlí. Færri íbúðir seljast á yfir ásettu verði og framboð íbúða eykst áfram hratt.
“HMS og Samtök iðnaðarins (SI) stóðu saman að talningu íbúða í byggingu á landinu öllu en niðurstöður hennar voru birtar í skýrslu í byrjun mánaðar. Samkvæmt skýrslunni voru 8.113 íbúðir í byggingu á landinu öllu samanborið við 7.260 í talningunni í mars sl. og 6.001 íbúð í september í fyrra. Aukningin frá því á sama tíma í fyrra nemur því 35,2%. Mesta aukningin er í Kraganum, þ.e. á höfuðborgarsvæðinu fyrir utan Reykjavíkurborg, en þar hefur fjöldi íbúða í byggingu nær tvöfaldast frá því á sama tíma fyrir ári,” segir í skýrslunni.
