Í þessari frétt langar mig aðeins að tala um stöðuna á fasteignamarkaðnum. Staðan er þannig að aðeins hefur hægst á sölu, sérstaklega á nýbyggingum, en það hefur líka verulega dregið úr nýjum framkvæmdum á nýbyggingum. Það er þó ekki algjört frost á fasteignamarkaði heldur virðist bara eins og fólk sé aðeins lengur að taka ákvarðanir, en þetta getur verið fljótt að breytast.
Vísbendingar eru um að kaupsamningum sé frekar að fjölga en alls voru 717 fasteignir teknar úr sölu á höfuðborgarsvæðinu í september sem er um 43% aukning frá því sem var í september í fyrra. Þetta kemur fram í mánaðarskýrslu HMS.
Ertu í söluhugleiðingum? Smelltu hér til að fá frítt söluverðmat
Eins og kemur fram í síðustu frétt þá hefur verulega dregið úr nýjum framkvæmdum að undanförnu og íbúðaþörf er að aukast þar sem íbúðaþarfagreiningar telja að byggja þurfi 5.000 íbúðir árlega næstu árin til að mæta íbúðaþörf. Ef það heldur áfram að draga úr nýjum framkvæmdum getur íbúðaþörfin aukist verulega.
Nú virðist eins og stýrivextir séu nálægt toppnum en eftir 14 hækkanir í röð ákvað Seðlabanki Íslands að halda vöxtum óbreyttum í síðustu vaxtaákvörðun. Þessi íbúðaþörf sem talað er um hér að ofan gæti þess vegna leitt til mikillar hækkunar á fasteignamarkaði þegar stýrivextir hætta að hækka vegna mikillar spennu eftirspurnarmegin.
