Ungir kaupendur eða þau sem eru 30 ára og yngri, voru 26,5% af heildarfjölda kaupenda í fasteignaviðskiptum á höfuðborgarsvæðinu á fyrsta ársfjórðungi á þessu ári. Samanborið við 35,4% á þriðja ársfjórðungi 2021 sem var á tímum COVID19 en þá var hlutfallið óvenju hátt. Frá 2009-2018 var hlutfall ungra kaupenda hins vegar yfirleitt lægra en það er nú. Þetta kemur fram í mánaðarskýrslu HMS.
Íbúðaverð nokkuð stöðugt
“Íbúðaverð á höfuðborgarsvæðinu hækkaði um 1,5% í mars frá fyrri mánuði miðað við vísitölu íbúðaverðs. Þar af hækkuðu íbúðir í fjölbýli um 1,0% en sérbýli um 3,4%. Þá hækkaði íbúðaverð í nágrannasveitarfélögum höfuðborgarssvæðisins um 3,2% á milli mánaða og annars staðar á landsbyggðinni um 1,2%. Þótt þessar hækkanir hafi verið umfram væntingar væri óvarlegt að draga sterkar ályktanir út frá breytingum milli einstakra mánaða. Ýmislegt getur skýrt breytingar á vísitölunni og íbúðir sem seljast í mismunandi mánuðum geta verið ólíkar að gæðum og gerð,” segir í skýrslunni.
Óverðtryggðir vextir hækka
Eins og komið hefur fram áður hækkuðu stýrivextir um 1% í lok mars. Nú hafa allir bankarnir brugðist við þeirri hækkun með hækkun á breytulegum óverðtryggðum íbúðalánavöxtum. Breytilegir óverðtryggðir vextir eru nú orðnir hærri en fastir vextir hjá öllum bönkunum og lægstu óverðtryggðu vextirnir eru að meðaltali 9,2%.
